ZORAM VEITUTE'N SEMINAR AN HMANG

Mizoram Lawrkhawm Zoram veitute'n Seminar hmang.

Zoram veitute'n Seminar hmang.
By Editor Wednesday Jan 13 2010 08:59 pm

Dt. 12-1-2010 khan Zawlbuk Online Group buatsaihin I&PR Auditorium-ah Mizote Value System bihchianna leh Tun dinhmunah Mizote tan Inchimralna a hlauhawm em tih thupui hmangin Seminar neih a ni a. Seminar hi session hnihah thenin chawhma leh chawhnu-ah hun hman a ni.



Session khatna chu Tv R.Lalvena (IAS) kaihhruaina hnuaiah hun hman a ni a, Pu R.Lalrinawma (IRS) in welcome remarks pe in Rev.Dr.K.Lallawmzuala’n hunserh a hmang a. Sesssion khatna-ah hian Rev.K.Lungmuana’n Inauguration Speech a nei a. “Mizote Value System bihchianna” tih thupui hmangin paper Tv L.P.Sailo (Switzerland) hnen atanga ngaihthlak niin zawhna leh chhanna leh sawihona hun tha tak neih a ni. Mizo pi pu te hunlai atanga tun thlenga Mizote value system kaihruaitu tarlangin tun hun a Mizote Value system a tha zawnga kaihhruai anih theih dan tur kawng hrang hrang tarlan a ni. Sawitu tam ber te chuan Mizote hmasawnna bulthut chu value system siamthat niah ngaiin siamthat leh herrem anih theih dan tur zau taka sawiho a ni.


Session hnihna chu Tv Vana Khawlhring in kaihruaiin Inaugural speech Dr L.H. Chhuanawma’n a pe a. “Tun dinhmunah Mizote tan Inchimralna a hlauhawm em?” tih thupui hmang a paper Pu C. Vanlalramsanga (IES) hnen atanga ngaihthlak a ni. Mizote tan inchimralna thlen theih dan kawng hrang hrang tarlan a ni a. Heng kawng hrang hrang a Mizote tun dinhmun thlirna neiin hemi kawnga hlauhawm thei te tarlangin invenna tur kawng hrang hrang zirho a ni. Sawitu tam zawk chuan tundinhmunah Mizote tan inchimralna hlauhawm theih dan leh invenna lam an ngaipawimawh tlang hle. Mizote inchimralna lak a kan him zel theih nana a sawrkar, kohhran, khawtlang leh mimal tin te tihtur leh hmalakna tur theuh uar takin an sawiho a ni.

Zawlbuk Online Group hi kum 2005 atanga Zoram veitu thenkhat khawvel hmun hrang hrang a awm ten email hmanga thu leh hla an inhlan chhawn thin atanga lo piang a ni. Pawl ang nilovin thianho inkawm khawm anga kalpui a ni. An thu leh hla te a lo darh zau zawk theih nan website www.zawlbuk.net chu siam a ni bawk. Ni 18 December 2006 khan Aizawl-ah “Mizoram Perspectives 2020” tih thupui hmangin seminar an lo buatsaih tawh bawk a ni.