Mizoram Hmar lam Tlangdungah

MIZORAM HMARLAM TLANGDUNGAH RIAL , RUAH LEH THLI-IN THIL TICHHE NASA

Vawiin Pathianni, March ni 28, 2010 khan Hmar tlangdungah rial a tla nasa hle a. Khaw engemaw zatah In tam tak a deng chhia a, Rial tla hian Biak In te pawh a den chhiat avangin zanin (March ni 28, 2010) hian inkhawm thei lo kohhran an awm nual a ni.Rial tla hian Bukpui khua tlaklam ah thli leh ruah bakah rial nasa takin a sur a, rial tla hian In chung engemaw zat a deng chhia a, Ar pawh a thi nual niin thudawn a ni.Rial tla hian Bukpui-ah hian Presbyterian biak In leh Salvation Army biak In chung pawh a den chhiat avangin zanin (March ni 28, 2010) hian an inkhawm thei lo a. Vawiin (March ni 28, 2010) tlaia Bukpui atanga thudawnna in a sawi danin ruah tlem a sur leh a nih pawhin in luah tlak loh In 100 a awm theih mai dawn thu a sawi a, rial hian In hi a dengchhe hlawm hle a, a bikin tlak lam pang darthlalang chu a deng keh vek niin thudawnna chuan a sawi a ni. Bukpui khua hi In 240 khuaa inchhal an ni a. Naktuk (March ni 29, 2010) lam khian heng in chhiate hi thawmthat hnatlang an nei dawn a ni.Bukpui bakah hian Suangpuilawn khua chu rial tla tuar nasa an ni bawk a, he khuaah pawh hian In 73 chu a chhia niin V/C te hnen atangin thudawn a ni a. Biak in pawh a chhiat avangin zanin (March ni 28, 2010) hian an inkhawm thei lo niin thudawnna chuan a sawi bawk.Hmar tlangdunga rial tla hi a tam thawkhat hle a, khawlai pawh suahdur nena thenfai ngai hial khawpin a awm niin thudawnna chuan a sawi a, Darlawn-ah In 100 vel a deng chhia a, Sawleng khuaah In 135 vel, Kepran-ah In 62 vel, Sunhluchhip-ah In 8 chu a dengchhe vek a, In 8 chu thawm that theih a ni. Serzawl-ah In 11 a chhe vek a, In 22 thawm that theih a ni a, Sailutar-ah In 64 a chhe bawk.Phuaibuang-ah pawh rial tla avang hian an buai hle a, thuchiang nghah mek a ni.
Thulakna: www.zawlbuk