Kan Nghah Kristmas
Published on: Dec 3rd, 2009 Posted by: zoin 26 views
By: Puibawiha, YangonZan dang anglo takin khum lu chungah Thleng a lo awm a, naupang tan chuan Mas putar hnen atangin eng nge an dawh thlak dawn tih chu thil hriat nghahhlelh awm ber a ni thin. Zan tlaiah van lam han hawi chho ila thlasikkawng paw chuk mai leh boruak vawt var mai te chuan e-nge maw titakin rilru a khawih a, Kristmas a hnai tawh a ni tih chu hai rual a ni lo.
Chhungkaw dinhmun la hmu fiah thiam ve lo naupang pakhat chuan, “Papi Mas kawrmawi ka duh ve,” a ti a, chutah a pi chuan a pawnfen chhung ipte chu a han zen a, cheng 20 tlang pakhat leh pin hi a rawn phawrh chhuak a. Naupangin cheng 20 a hmuh chuan a lawm em em a, khawdang pawh hawi lovin a pi kuta cheng 20 chu a thlir reng a. Mahse a pi mit atang chuan mittui a rawn far chhuak ta zawih zawih mai a. A tupa naupangte chu kuahin, “Mamte, i nu leh pa kha la dam sela chuan i duh zawng tak Mas kawrmawi an lei sak ve tur che a nia,” a ti khur dar dar mai a.
Pu Rokunga’n “awmlai vei leh lungsun fate chan tawk hi dawn ve teh, hnutiang mual liam hnu ngaiin an tap e..” a lo ti a. Thlalak hlui te kan han thlira an hmel leh kimtlangte chu a la ngai reng a, mahse hmuh phakah an awm si lo. Damdawi inah han kal ila, dam lo balhla leh buhhawp ringa mahnia zun ek pawh thiar thei lo, Kristmas ruai leh a boruak hlimawm takte, zanlai inkhawma tel chak ve ngawih ngawih damlo khuma taksa chau tak maia mu chunga; damin Kristmas te hi ka la hmang ve leh thei ang em aw… tia rilru ngui taka inngaihtuah mekte chan hi a na a ni. Nakum Kristmas chu kan hmang ho ngei ngei dawn a nia aw ti a, min chah lawm lawmtuten mual min liam san leh ta si te hi, he Kristmas a lo thleng hian a hrilhhai thlak leh zual thin. Chhung leh kua te nen Kristmas hlim leh lawm taka hman ve theih nan tia sum zawngtuten vanduaina tawka thlanthim an han pan leh ta mai thinte hi an nupui fanaute leh chhungte tan chuan a va han na duh dawn em. He kristmas a lo thlen hian hnutiang mual liam hnu ngaia an tah hi dawnpui ve tur leh mahni hma chauh sial lo turin Pu Rokunga chuan min sawm a ni.
Kristmas hun a lo thlen hian ngaih tur a pui leh hriatchhuah tur kan nunah a lo inlar zut zut mai zawng a nih hi. Dik tak chuan khuang te leh khuang pui ri ringawt pawh hriat thlakhlelna hmun a tang hian, kan vangkhua leh zonun ngaih a zual ngei e. A hnam pum huapin keini zofate nunah “khuang” hian nasa takin hmun a chang a. Kan khawhar inah pawh a lailum luahtu ber chu khuang hi a ni. Biak ina mihlim muthlu kaitho thintu pawh khuang hi a ni a. Nu leh pate pawhin he hun hlimawmah hian, Bethlehem dai nghawr nghing dup dup khawpa khuang pui leh khuang te chumchilh an thlahlel fo thin.
Kristmas tree, in cheimawina chi hrang hrang leh electric eng chi hrang mawi tak tak han hmuh hian kan nghah Kristmas chu a lo thleng mek a ni tih min hriattir a. Dawr hmun han kal ila thawmhnaw mawi chi tin reng leh an hla mawi ri te chuan Kristmas chu a lo thleng mek a ni tih min hriattir a. Biak ina kan fak hlate leh thu hrilhtu sermon te pawhin Bethlehem lam min hawi pui a. A taka kan hmuh phak loh pawh rinna mitin kan thlira Bethlehem dai phullenga berampute ram tuannaah van Angel var lung kan rualpui a. Khawlai han leng ila naupang ncheina kawrmawite chuan Kristmas ni ropui an puang chhuak lo vem ni. Kual zin leh zirlai, hmun danga hnathawk mahni in lam pana insulpel zung zungte chuan Kristmas hnaih tawh zia an sawi mawlh mawlh a. Zan tlaiah van lam han hawi chho ila thlasikkawng paw chuk mai te chuan Kristmas a hnai tawh a ni tih min hrilh ve bawk a. Chu, ralkhata zai ri chu Carol thawm a ni lawm ni? Kristmas min ngaihtirtu leh min hriatchhuah tirtu thil mawi chitin reng leh thilsiam zawngte hi an va han hlu tak em. Heng lo pawh hi kan nunah Kristmas min hriat chhuahtirtu sawi tur tam tak kan nei theuhin a rinawm.
Keipawh maw, lungchhiaa tahna tur em chu ni lo mah se, Kristmas min hriatchhuahtir thintu kha; khawpui laili-ah leh bazarah te, dawr hmun ropuiahte ka han zawnga ka hmu lo. Pangpar huan mawi tak takte pawh ka han fanga a tan hmun reng a lo awm ve lo. Biak in leh in ropui tak tak an cheimawina hmun ka han thlir a chutah pawh chuan hnawlin a lo awm leh si. Khawiah riah run rem ve tak ang che maw? Heng hmun ropui tak takah te hian i tan hmun a awm ve lo em ni tichung zelin beidawng taka khawpui chu chhuahsanin daiah ka han kala, tahchuan ka tawngta chhandamtu pian thu min hrilhtu chu; in satuten an duh loh a kila lung tangkai tak ang mai kha. A riah run remna hmun chu tlawmin vuikhuten bawh chik chek mah se kei ka tan Krista inngaihtlawm zia min hriat chhuahtirtu a lo ni a. Khawpuia lutchhuak a piangte hnenah leh Zofaleng zawngte hnenah Krista pian thu chu ngawi rengin a puang chhuak mawlh mawlh mai si a ni.
Hnam dang tan chuan daia hnimhnah to ang lek mah nise Zofate nun chhungrilah erawh Kristmas nen inkungkaihna thuk tak nei, kan hmuh ringawt pawha Kristmas min hriat chhuahtirtu chu, “Tlangsam par” hi zuk ni ve tlat a. Rose par iangin hringfate hnarah rimtui a chhuah ve lo a nih pawhin Zofate nun chhungril thuk takah erawh hmun a khuar ve tlat si. Khual buk chang lo ran chaw pekna thlenga lo piang Lal Isua ang maiin a hmel enin a tlawm naa khawvel hnenah Krista pian thu puangtu ropui Zofate tan a lo ni e.
Krista thisen chuan kan sual hliam tuar a tidam a. Chutiang bawkin ani pawh hian kan pem/hliama thi chhuak te min tihdam sak thin. A hnah tui sawr hi pem thar damdawiah a tha em em si a. Dai ka chuana samtlang mawiten lo par vul siau ve, Hmanah Bethlehem daiah van Angel zai mawi lo ri; Tunah erawh kan dai ngeiah mawiten par chhing chheng e, Zofate thinlungah nausen Isua pian thu puangchhuak ve-in.
(He article hi ZOIN huanga kan rawngbawlpui Pu Puibawiha’n nikuma a ziak a ni a, tuantul avangin kumin hi kum dang angin mi a rawn tawiawm hman lutuk lo a, amah kan ngaihzia lantirna atan a thuziak hi kan han phochhuak leh a ni. Ed ).