MIZORAM SAWRKAR HLAWH A PUNG DAWN

Mizoram sorkar hnathawk hlawh a pung dawn
Friday, 04 December 2009 05:44 Athaa Khiangte



jQuery(document).ready(function() {
jQuery("a#single_image750").fancybox();
});
Sixth Pay Commission rawtna dung zuia Mizoram sorkar hnathawkte hlawh bi thar tur ruahmantu, Fitment Committee rawtna chu Mizoram sorkarin a pawm ta a, Krismas hmain hlawh thar hi pek tum a ni.Chief Minister Lal Thanhawla chuan nimin chhun khan CMO Conference Hall-ah press conference koin, sorkarin Fitment Committee rawtna a pawm tak thu hi a puang. He hlawhbi thar hi 1.1.2006 atanga chhuta tihdanglam a ni ang a, ni 31.3.2009 thlenga an hlawh lak tawh, hlawhbi thar zat a tlin lohna chu arrear-in siam a ni ang a, chu arrear chu pawisa faia sem lovin, GP Fund-ah dah a ni ang a, kumin April leh tun inkara an hlawh punna erawh chu GPF-a dah tur nge pawisa faia pek tur tih sorkarin a la rel ang.Sixth Pay pawm a lo nih tak avanga sum mamawh belh chu cheng vaibelchhe 151 a ni a, vawi leh khata sem tur ni lova GP Fund-a dah a nih dawn vangin sorkar chuan a buaiphah lutuk lo tura ngaih a ni. He hlawhbi thar avanga tun pawisa kum kal meka sum mamawh belh zat chu vbc 68 a ni ang a, Pay Commission awm leh hmaa sorkar hnathawk hlawh atana pawisa mamawh belh tur chu vbc 771 vela chhut a ni.Sixth Pay Commission rawtna a ngai ngaia pawm mai lova, Fitment Committee siam a tul chhan sawiin Chief Minister chuan, "Sixth Pay Commission hi Central hnuaia sorkar hna leh thawktute hlawhbi mila siam a ni a, chu chu state sorkar hna leh hlawhbi nen hmehbel harsa a tam em em a, chuvangin mahni state mila siamrem ngai apiang siamrem hmasak phawt loh chuan a pawm ngawt theih loh a ni," a ti a, "Fitment Committee rawtna hi sorkar hnathawk hmun ngaa then hmun li vel laiin an pawm theia hriat a ni a, pawm thei lo an awm pawhin hriat fuh loh an neih vang a nih kan ring a, inhrilhfiah hnua pawm thei lo tur an awm kan ring lo a ni," a ti.Hlawhbi thar an ruahman chhung zawnga sorkar hnathawkten dawhthei taka an lo nghah avangin Chief Minister chuan lawmthu a sawi a, sum dinhmun hre chiang bertu an nih vangin neitu rilru an put vang nia a hriat thu a sawi bawk. Hetihlai hian Federation of Mizoram Govt. Employees & Workers President T.Sangkunga chuan, sorkarin a pawm tak Fitment Committee rawtna chu kimchanga an la hmuh loh avangin ngaihdan sawi tur a la nei lo tih Vanglaini a hrilh. Lal Thanhawla chuan, Vairengtea Counter Insurgency and Jungle Warfare School (CIJWS)-in ram a mamawh belh chu Mizoram sorkarin a pe thuai dawn tih a sawi chiang a; ram pek belh tur chhunga compensation beiseitute pass neih chu a lem leh a tak fimkhur taka thliar a ni dawn tih leh, phuahchawp pass neite chu danin an chungthu a rel mai tur thu a sawi.Chief Minister chuan tun hnaiah zirtirtu post thar 270, Forester post 10 leh Forest Guard post 25 sorkarin a siam belh tih a sawi bawk a; zirtirtu post siam belh a ngaih chhan hi indaih loh vang ni loin, indaihna hmun khawpuia thawkte hi indaih lohna hmun thingtlanga kan sawn theih loh vang a ni," a ti. Zirtirtu post chungchanga Central kalphung (norms) chu zirlai 40 tan zirtirtu pakhat (1:40) a nih laiin tuna Mizoram dinhmun chu zirtirtu pakhatin zirlai 12 zel enkawl (1:12) ang a ni tih a sawi a, sikul mamawh anga zirtirtu sawn darh hi tu sorkar mahin an ti thei lo tih sawiin, insawipui kan uar lutuk vangin sorkarin a duh angin a ti thei lo a, post siam belh a tul phah ta niin a sawi.Chief Minister hi Cabinet minister pahnih H.Liansailova leh Zodintluanga, Parliamentary Secretary Lal Thanzara leh Principal Secretary C.Lalsawta-ten an tawiawm a, media lam an kal thahnem hle a ni.