I Ngaihtuah Ngai Em?

By; Mamawii, Satawm Kan dinhmun danglam theihzia hi I ngaihtuah ngai em? Mi hausa an hausa reng bik lo angin zirlai pawh zirtirtu a la ni thei a ni. I mi ngaihsan loh ber pawh kha I tana tangkai ber a la ni thei a ni. He danglamna hi nangmah ngeiin I la tawng lo a nih paw’n han ngaihtuah la, I hmuh phakah an awm ngei ang. Kan hun hman tawh thin dan leh tuna kan hman mek khaikhin a, kan hmalam hun tur suangtuaha inbuatsaih lawk hi hmasawnna a ni.

Venga kan dinhmun leh tuna kan dinhmun hi han khaikhin dawn ta ila, venga dawrkai pa khan a thenawmpa harsat ber lai pawn a baa laktir a phal ngai lo va, hmasawnna beiseiin ram dangah an rawn kal ve ve a. Venga mi rethei pa kha a hna luhna a fuhin, hlawh tha zawk leh dinhmun tha zawkah a awm a, dawrkai pa erawh harsa takin venga a biak that duh ngai loh te tanpuina dilin a belbul hial a ngai tlat. Chutiang bawkin sumdawng hausa pa biak that hlawh ngai lo leiletpa pawh hetah chuan sumdawngpa biak rawn ber, rinchhan ber a ni leh thei tlat! Kan hnena inhlawhfa thinte hnena cheng puk kan dil fo te a ngai ta. Venga kohhran leh khawtlanga hruaitu hna chelh reng te pawh ram dangah chuan inthlahthlam nuam ti em em, member langsar lo ber, hruaitute sawisel nuam ti riau re kan ni ta. Lehkha thiam, sap tawng thiam intia venga hawi pir ve tak te pawh thleng hmasa, lehkha thiam lo, a ram tawng lo thiam tawh te tanpuinain an kuthnuaiah kan thawh a ngai ta thin. Hei hi engvang nge? Dinhmun thaa kan dinin danglam reng khawvel hi kan ngaihtuah chiang phal lova, kan chapo a, dinhmun thaa ding reng tura kan inngaih vang a ni.
Tuna kan dinhmun atang hmalam hun tur han suangtuah leh dawn ta ila; heta kohhran leh UN lama thawktute hi ram danga kan kal leh hunah hruaitu an va ni tawh kher lo vang. Midang tana tangkai theia kan awm lai, pui theitu dinhmuna kan awm theih chhung rei lo teah hian kan chapo mai em ni? Enge kan dinhmun? Keini ang ve mai tan chuan UN lama thawktute leh kohhrana hruaitute hi a tul hle loh chuan kan be tha ngam vak lo va. Chumi kara anmahni zawkin hawihawm taka tawngkam hnih khat leka min han biak hmasak te hian kan lawm em em a, kan theihnghilh thei tawh lo a ni. Hna luh fuh avanga harsa ve lo, hlawh tha tak te hian mi harsa te tanpui ngai te I pui hreh lo ang u. Nakina I tana tangkai ber an la ni thei. Malsawm dawnna leh nun hlimna bakah Pathia duh zawng ti I lo ni reng dawn a sin. Mimawl tak leh harsa be rte pawh ngaihsak thiam hi an ropui ka ti. Amah Rev.Dr.Vanlalhnema’n “Nangmah hi sang taka inda la, midang te hi chu-ai hniam loah dah ang che” a tih fo hi belhchian dawl ka ti. Mahni kan inngaihsan hi chuan midang te kan hnuaia dah mai hi kan tum thin a, chuti ni lovin mahni pawh in ngainep lo, mitin te mahni level puia en thiam a tha.
Hun leh kum an danglam a, kan dinhmun pawh a danglam thei reng a ni tih hre rengin dinhmun thaa ding mek te pawhin chapo mai lovin leh tuna harsatna tam tak nei te pawh beisei mai lo tur kan nih lohzia hre thar leh ila, chhun leh zan a awm a, kan nunah zan hun a lo thlenga zing khawvar engmawi tak hmuh kan hmabak a ni tih hriain I beidawng lo ang u. I chapo lo ang u.