Tihian ka dawn thina,hringnunah hian Darthlalang hi lo awm lo nise,hmelthain mahni thatna hre lovin,hmelchhia pawhin mahni chhiatna hre bik dawn hek lo, mahni tawkah tha a inngaiin hlim tlang takin run hmun kan leng tlang thei lo ang maw te ka lo ti reuh reuh va. Mahse Siamtun midangte hrilh leh sawi ngai lovin mahni din hmun hriattheihna min lo pe hi a lo ni zawk. Darthlalang hi mite nun tihlimtu a nih rual rualin thenkhat tan chuan a lungchhiat thlak hle. Nu leh pate han mawhchhiat theih lah ni si lo, naupang ang maia a nu a pa hei chu a duh lo a dang min thlaksak rawh u,han tih chi lah ni si lo chu a nih ang anga zan mu chhinpui mai lo zawng tih theih a awm ta lo.
Miten insit hauh lova sakhming leh pumrua chawia,"i chhai te'ng aw chhingkhual lanu" an tih laiin kei zawng ka sakhmel hi a sakhmel deuh nge pawh ka hre lo,darthlalang hian zuamna mi pe hlawl lo. Tunlaiah sum ngah ngah hmeltha tih leh UN card ngah ngah hmeltha an tih thawminmi han den chan phei hi chuan mihringte hi an danglam zo ta nge,khawvel hi a danglam zawk? tih te ngaihtuah rum rumin ke zungpuia inawh hlum hial ka nap thin. Tu khaw hriat hleih loh hian suangtuahna ramah lengin duh thu ka han sam vel thina,mahse chu hlimna chuan rei a deih leh meuh si lo,hringnunah hian vanduai bikah inngaiin phunnawina ka zawng leh thin. Chutia rilru mangan leh chauva ka rum mek lai chuan,tumkhat chu hmel mawina Darthlalang ka zawng hmu ta hlauh mai. Miten darthlalang hmanga an mawina an thlir ning theih loh laiin kei ka tan chuan ' ziak leh chhiar tam hi' ka hmel mawina darthlalang a lo ni reng mai le. Ka chhiar tam pauh leh ka nunin a mamawh leh siamthat ngai ka hmu tamin tunlai khawvel boruak hip dan min zirtir thin. Chu chuan chhungril fanin pawn lamah a mawina a rawn par chhuahpui hi a lo ni. Tin, lehkhabu chhiar harsatna hmuna ka awmin thenawmte hi ka darthlalang an lo ni leh tlat. Khawi hmunah pawh awm i la mite hian min thlir renga, kan hmel leh nungchang hi thenawm khawvengte mitmeng leh tawngkamah a lang fo. Mahni tawkah tha i lo in ti viau pawh a ni mai thei,i hmel that leh that loh i hriat duh chuan lehkha chhiar tamin i themawm khawvengte mitmeng leh tawngkamah inenfiah rawh.
Lehkha chhiar hi taimak a har hle a, keini tlangmi mi tam zzawk ngatte phei hi chu harsat vang chu thukhat, lehkha chhiar paih lovanga pawl 10 pawh thleng pha lo kan ni deuh thun awm e. Chu chhiar paih lohna chuan mawlnaah min hruai lutin kan khawvel nun a tizim hle a ni. Rome thufing chuan " I thlarau chhandam nan Lal Isua ring la,nun kawng tha i hmun nan Bible chhiar la,tih fina i awm nan lehkhabu chhiar tam rawh",a ti. Keini ringtu intite ngat phei hi chuan Bible hi chhiar tamin bih tam i la, kan nunin a mamawh leh hmel mawina lotion chi hrang hrangin a khat a ni. John Miltona phei chuan," Lehkha chhiar chu remruat thiamna a ni a, rilru chhungril leh a nunna thisen,dam chhung nun leh a piah lam tana ral mai lo tur chu a ni," a ti. Lehkha chhiar tam bula awm chu a nuamin a hlimawm bika, an tlakna lei ram tha vak lo mahse an par erawh a vul reng thin a ni.
Lehkha chhiar tam hlawkna chu kan hmel hi mite hmelah leh nunah a engchhuak deih hi a ni. Chuvang chuan i ban phak tawka lehkhabu awm kha han chhiar ngat mah teh, i hriat loh hlanin i hmel a lo tha sawt sawt mai ang. Khawi hmunah pawh kal la, ni sa do avangin i hmel a dum phah tawh lo vanga, i chhiar tam pauh leh mite tan malsawmna hmel thar i lo ni zel ang.
Chhiartute Lalpan malsawm che u rawh se!
0 comments:
Post a Comment