Science leh Technology hmasawnna chuan san lam a pan chho zela, pi pute suangtuahna rama pawh awm ngai lova kha tunah chuan a ni ta rup mai le. Internet,Fax,E-mail,Computer,Video,Car,Camera,Mobile,damdawi chi hrang hrang,zirna leh thiamna,ei leh bar,silh leh fen,' si ' hlira khat a rawn herchhuahpui ta zung zung mai . Eng engte nge a rawn herchhuahpui leh zel dawn erawh sawilawk a har hle. Khawvel hi a danglam ni lovin mihringte hi kan danglam vang a ni zawk. A nei-pa chuan ram hrang hranga a chhia leh tha thil thleng mekte chu a laikhum atangin a thlir meka,D nei tan pawh kar hla mahse awka hriatnain thinlung a hnai tlat thin!
Khawvel hmasawnna hian kan duh emaw duh lo emaw kan kerekah manin a hnuhin min hnuk ni ta berin ka hria. A neiate a pawng ur ur laiin a nei loate lah naupang hrisel lo leh thang thei lo tak, lu leh dul chang liana eika erawh tui viau si hi kan anga a hreawm hle mai. Tunlaiah miten tha si, mawi si,tlo si,"si" hlira khata khawsak an rel laia, kut ke kim biai siin, retheina avanga piangsual nih leh sal tang han nih tlat chu a va beidawn thlak em! Retheih lutuk hi chuan hawihawm lo nih leh mite endawn nih hlawh mai ni lovin, beidawn luat avanga suahsual rawngbawl pawh awl at a ni.
Intlansiakna khawvelah hian tel i duhin i fate tlantir ve i duh a,mi fing leh fel nih tir i duh tak meuh chuan an tan i that lai hun pe rawh. An naupan tet atangin an nun zia en la, an tuina lam lamah puitling turin zirtir rawh. An zia en lova i duhna ringawta khalh i tum chuan Bawngtuai sawi ang maiin an kal tha peih chuang lo vang. "Naupangte chuan sawiseltu aiin enkawltu tha an mamawh" tih hi Father Flanagon-a thu chhuak a ni. Pu.Lalhnema pawn ti hian hlaah a lo phuaha,"Ka nu ka pa in kutah ngei hian ka nakin nun a innghat e, eng ang mi nge ka nih ve ang,in mi enkawl danin a hril ang chu" a lo ti.Vawin nia i fate din hmun hi en la i zirtirna that leh that loh chu i hre mai ang.Hringnuna zirna run sang ber chu 'chhungkua' hi a ni. Chhungkua in zirtirna a that loh chuan hringnun hi a chhe vek thin. Hnam puite chuan an nulat tlangval lai hun atangin an fa turte tan rual ban loh hlauvin kawng engkiman nun ulukin hma an lo inkhuar lawk thina,chung mite fa chu an lo puitlingin an duai ngai lo. Hringnun inlumlet zel hian inbuatsaihna nei leh nei lote din hmun chu min buk zel a nih hi.Engvang nge keini Zo hnahthlakte hi mi harsa leh rethei kan tam em em tih chuan nu leh paten fate tan an nun an hlan ngam loh vang a ni. Tunah mai ni lo, i nulat tlangval lai hun atang tawh khan i fate zirna tur,silh leh fen,ei leh in,dandawi man,an zahawmna tur leh an felna tur khawi khawiah emaw i eiin zo veka,tunah an lo puitlingin khawvel hmasawnna chuan rip chhungah a khung mek a nih hi.I zahawm loh chuan i fate an zahawm lo va nga,i rethei lutuk chuan an tan mi fing leh fel nih a har a nga,rual awtnain hringnun an hmachhawn ang.
Khawvel hmasawnna hian thlei bik a nei lova, tui lian hrut ang maiin min hruta, a sang deuh chu a chim lova,. a hniamho chu Ar-te tui tla ang maiin kan inhai fat fatin kan hak hlum lo chauh a nih tawh hi!!! Zirna lama kan hniam hi chu sawi loh chet zia thlenga kan la hniam hi chu ' lung mawl vang nge rairah vang 'ni ta ang? Nakin hun kum 10-20ah khi chuan Thirsakawr,Bike,zirna lamah Pawl 10,Collage, silh leh fenah cheng 2000/3000 man an duh tawh dawn lo ni lovin a inhmeh tawh lo va nga,Car,Mobile,Computer,Internet, zirna lamah Dr, Ph.D,silh leh fenah cheng 20000/30000 man an duh tawh dawn ni lovin a tul tawh zawk ang. Chumi din hmun ding pha ve tur chuan enganga inbuatsaihna tha nge ngai ta ang? Mihring hian malsawmna dawn hun lai bik riau hi kan nei a,kawng engkimah hmui a ngil thin. Chu malsawm dawn hun laia Lalpa tihna chang hre lo leh inchhekkhawl thiam lote chu an da leh thuai thin.Chuvang chuan i that lai hun hian hma lam thlir chungin tan la rawh.Chuti ni lova, khawpui bathlar hnuaia neitu awm lo,zilhhautu nei lo leh ngaihsaktu awm lo Ui-pui no nei ang maia fate i neih zawngin i la lar ang!!!
Kan nulat tlangval, kan that lai hun hian nun ulukin hma lam hun tur thlir thiam i la,Lalpa tih chunga thahnem ngaitaka eng hna pawh kan thawh chuan khawvel hmasawnna hian thang leh thar turte,luipui lianin phairuang sirah a hnawl ang mai ni lovin min luan pui zel a nga, tichuan tuifinriat zau tahah khian hnam dang unaute nen angkhatin kan leng za tawh ang.
Lalpan in rawngbawlna a tharin malsawm zel rawh se.
0 comments:
Post a Comment